Portugaliyada, Portucalense universitetinde DIANA joybarı sheńberinde ótkerilip atırǵan seminar-trening dawam etpekte. 1-iyul kúni qatnasıwshılar Arcos de Valdevez aymaǵında jaylasqan Nowhere Desk hám Parades de Coura aymaǵındaǵı Casa das Janelas Verdes atındaǵı awıl xojalıǵı obyekti iskerligi menen tanıstı. Sapar dawamında jergilikli hayallar tárepinen alıp barılıp atırǵan isbilermenlik tájiriybeleri hám jetilistirilip atırǵan tábiyiy ónimler haqqında maǵlıwmat berildi.
Sonday-aq, Nókis mámleketlik texnika universiteti wákili Asiya Tureniyazova Turizm hám mádeniy baylıqtı saqlaw departamenti direktori Isabel Freitas penen ushırasıp, Erasmus+ Horizon tańlawına Ózbekstanlıq sherikler tárepinen tayarlanǵan eki joybardıń prezentaciyasın usındı hám Portucalense universitetin usı joybarlar konsorciumına sherik retinde qosılıwǵa shaqırdı.
Usınılǵan joybarlar departament qánigeleri tárepinen joqarı dárejede bahalandı. Sonday-aq, olardıń temaları hám maqset-wazıypaları Portugaliya xalqı ushın da áhmiyetli hám aktual ekenligi atap ótildi.