Baspasóz xızmetkerleriniń miyneti joqarı bahalandı

27-iyun — Baspasóz hám ǵalaba xabar quralları xızmetkerleri kúni múnásibeti menen Nókis mámleketlik texnika universitetinde bayram ilajı shólkemlestirildi.
Ilajda universitet rektorı B.T.Kaipbergenov búgingi kúnde baspasóz hám ǵalaba xabar quralları xızmetkerleriniń jámiyetlik turmıstaǵı ornı hám áhmiyeti barǵan sayın artıp atırǵanlıǵın ayrıqsha atap ótti. Ol óz sózinde málimlemeniń jedel, qalıs hám isenimli jetkeriliwi, jámiyetshilik penen ashıq pikirlesiwdi támiyinlew jáne bilimlendiriw tarawında ámelge asırılıp atırǵan reformalardı keńnen sáwlelendiriwde baspasóz xızmetkerleriniń pidákerlik miyneti sheksiz ekenligin atap ótti.
Sonday-aq, universitet turmısı, ilimiy jetiskenlikler, studentlerdiń tabısları hám áhmiyetli waqıyalardı keń jámiyetshilikke turaqlı jetkerip berip atırǵan málimleme xızmeti hám ǵalaba xabar quralları wákilleriniń juwapkershilikli jumısı joqarı bahalandı.
Ilaj sońında universitet jumısın nátiyjeli sáwlelendirip kiyatırǵan bir topar xızmetkerler universitet rektorınıń minnetdarshılıǵı hám de estelik sawǵaları menen sıylıqlandı.