25-iyun kúni "Aq quw" kompleksinde jaslardıń baslamaların qollap-quwatlaw, olardıń innovaciyalıq ideyaları hám startap joybarların rawajlandırıwǵa qaratılǵan "Jaslar hám investorlar" ushırasıwı bolıp ótti.
Usı ilajda Nókis mámleketlik texnika universiteti student-jasları da belsendi qatnasıp, jaslar ushın jaratılıp atırǵan imkaniyatlar, investiciya tartıw mexanizmleri hám de isbilermenlik jumısın jolǵa qoyıw boyınsha prezentaciya hám dodalawlarda qatnastı.
Ushırasıw dawamında startap joybarlarınıń avtorları óz ideyaların investorlar hám isbilermenlerge usındı. Ashıqtan-ashıq sáwbet tárizinde shólkemlestirilgen ilajda isbilermenler ózleriniń ámeliy tájiriybeleri menen bólisip, jaslardı qızıqtırǵan sorawlarǵa juwap berdi hám joybarlardı rawajlandırıw boyınsha usınıslar berdi.
Bunday ushırasıwlar jaslardıń innovaciyalıq pikirlewin rawajlandırıw, olardıń biznes hám startap ekosistemasındaǵı belsendiligin arttırıw, sonday-aq ideyalardı ámeliyatqa engiziwde úlken áhmiyetke iye.
Ilaj juwmaǵında startap joybarları menen qatnasqan belsendi jaslar múnásip sıylıqlandı.