Búgin Nókis mámleketlik texnika universitetinde 8-dekabr - Ózbekstan Respublikası Konstituciyası qabıl etilgen kún hám Bas Nızamımızdıń 33 jıllıǵına baǵıshlanǵan saltanatlı ilaj bolıp ótti.
Ilaj Ózbekstan hám Qaraqalpaqstan Respublikalarınıń mámleketlik gimnleriniń atqarılıwı menen baslandı.
Ilajdı universitettiń oqıw isleri boyınsha prorektorı R.Oteniyazov ashıp berip, Konstituciyanıń mámleketimizdiń rawajlanıwındaǵı ornı, insan qádiri, erkinlik, teńlik hám ádillik principleri, sonday-aq, jaslardıń huqıqıy mádeniyatın arttırıw hám jámiyette belsene qatnasıwın támiyinlewdegi áhmiyetin atap ótti.
Ilajda Qaraqalpaqstan Respublikası Joqarǵı Keńesiniń komitet baslıǵı Murat Atamuratov, Májbúriy orınlaw byurosı Qaraqalpaqstan Respublikası basqarması aǵa inspektorı Begdiyar Utebaev, Milliy gvardiya Qaraqalpaqstan Respublikası boyınsha basqarması baslıǵı orınbasarı Umidjon Avezov, sonday-aq, professor-oqıtıwshılar hám student-jaslar qatnastı.
Ilaj dawamında Konstituciyanıń qabıl etiliw tariyxı, ondaǵı tiykarǵı principler, sonday-aq, insan huqıqları, erkinlikleri hám puqaralıq juwapkershiligine baylanıslı máseleler dodalandı. Qatnasıwshılarǵa Konstituciyanıń ámeliy qollanılıwı, jámiyetlik qáwipsizlik hám sud qararlarınıń orınlanıwı sıyaqlı máseleler haqqında maǵlıwmatlar berildi.
Ilaj juwmaǵında Konstituciya kúniniń tariyxıy áhmiyeti hám onı turmısqa engiziwdiń áhmiyetli ekenligi jáne bir márte atap ótildi. Sonıń menen birge, mámleketimizde jaslar ushın jaratılıp atırǵan keń imkaniyatlar, olardıń bilim, sheberlik hám jetik insan sıpatında kamalǵa keliwinde Konstituciyanıń belgilep bergen normaları áhmiyetli tiykar bolıp xızmet etip atırǵanı atap ótildi.