Konferenciya jasıl ekonomikanı rawajlandırıw, zamanagóy informaciyalıq texnologiyalar hám jasalma intellekt imkaniyatlarınan nátiyjeli paydalanıw, sonday-aq, bul baǵdarlarda alıp barılıp atırǵan ilimiy izertlewlerdiń nátiyjelerin dodalawǵa baǵıshlanǵan.
Ilajda "Qr Mentor Center" Nukus biznes inkubatorı direktorı X.Kaipnazarov hám Nókis mámleketlik texnika universitetiniń ilimiy isler hám innovaciyalar boyınsha prorektorı M.Artikbayev shıǵıp sóylep, konferenciyanıń ilimiy-ámeliy áhmiyeti, jasıl ekonomikanı rawajlandırıwda zamanagóy texnologiyalardıń ornı hám ilimiy izleniwlerdiń áhmiyetliligi haqqında pikir bildirdi. Sonday-aq, Nawayı mámleketlik kánshilik hám texnologiyalar universitetiniń professorı I.Kalandarov Zoom platforması arqalı onlayn qatnastı.
Konferenciya baǵdarlamasınan jasıl ekonomikada sanlı transformaciya hám jasalma intellekt integraciyası, telekommunikaciya hám televizion texnologiyalarında jasalma intellekttiń ornı, aqıllı bilimlendiriw platformaların islep shıǵıw, bilimlendiriw procesindegi mashqalalar hám olardıń sheshimleri, sonday-aq, sanlı transformaciya sharayatında kiberqáwipsizlik máselelerine baǵıshlanǵan bayanatlar orın alǵan.
Ilaj dawamında ilimpazlar, professor-oqıtıwshılar hám izertlewshilerdiń ilimiy izleniwleriniń nátiyjelerin usınıw, taraw mashqalaların tallaw hám perspektivalı sheshimler boyınsha pikir almasıw ushın imkaniyat jaratılmaqta.
Ilimiy-ámeliy konferenciya ilimiy birge islesiwdi rawajlandırıw, jańa ideya hám usınıslardı alǵa qoyıw jáne jasıl ekonomikanıń rawajlanıwında jasalma intellekttiń imkaniyatların keńirek úyreniwge xızmet etedi.
