Joqarı oqıw orınları studentleri arasında ekologiyalıq mashqalalardı innovaciyalıq sheshimler arqalı sheshiwge qaratılǵan joybarlar hám qollanbalardı tanıstırıw, úgit-násiyatlaw hám qollap-quwatlaw maqsetinde shólkemlestirilgen kórgizbe Nókis mámleketlik texnika universitetinde de kóterińki ruwxta bolıp ótti.
Qorshaǵan ortalıqtı qorǵaw, klimat ózgerislerine qarsı gúresiw, shıǵındılardı qayta islew hám azaytıw, qayta tiklenetuǵın energiya dárekleri, innovaciyalıq ekologiyalıq texnologiyalar hám qurılmalar baǵdarları boyınsha qatnasıwshılar komandalıq hám jeke tártipte óz joybarların usındı.
Qatnasıwshılardıń joybarları universitet ilimiy isler hám innovaciyalar boyınsha prorektorı M.Artikbaev, "Ximiyalıq injenerlik hám qorshaǵan ortalıqtı qorǵaw" kafedrası docentleri A.Reymov, D.Bazarbaeva, "Energetika hám avtomatlastırıw" kafedrası docentleri T.Kurbaniyazov, I.Jaksimuratov, "Mexanika injenerligi, miynet hám texnika qáwipsizligi" kafedrası oqıtıwshısı PhD B.Qosımbetovlardan ibarat bahalaw komissiyası tárepinen kórip shıǵıldı.
Joybarlardı bahalaw dawamında olardı ámeliyatqa engiziw imkaniyatı, áhmiyetliligi sıyaqlı bir qatar máselelerge itibar qaratıldı.
Tóreshiler quramı aǵzaları qatnasıwshılarǵa hár qıylı sorawlar menen múrájat etip, qatnasıwshılardıń imkaniyatların da sınaqtan ótkerdi.
Kórgizbe juwmaǵında hár úsh baǵdar boyınsha jeńimpazlar anıqlanıp, olar múnásip sıylıqlandı.
