Treningniń birinshi kúni joybardıń jergilikli koordinatorı, Nókis mámleketlik texnika universiteti "Kompyuter injiniringi" kafedrası baslıǵı Asiya Tureniyazovanıń "Isbilermenlik kompetenciyaların rawajlandırıw ushın SCAFFOLD pedagogikalıq quralı (Evropa Awqamınıń EntreComp ramkası tiykarında)" temasındaǵı prezentaciyası menen baslandı.
Prezentaciyada isbilermenlik kompetenciyaların rawajlandırıwda Evropa Awqamınıń EntreComp ramkası hám innovaciyalıq pedagogikalıq qurallardan paydalanıw imkaniyatları haqqında maǵlıwmat berildi.
Sonıń menen birge, teoriyalıq bilimlerdi ámeliy kompetenciyalar menen baylanıstırıwǵa qaratılǵan oqıtıw jantasıwları sáwlelendirildi. Prezentaciya dawamında 102 kartadan ibarat SCAFFOLD pedagogikalıq toplamınıń imkaniyatları da tanıstırıldı.
Bul oqıtıwshılarǵa cifrlı, isbilermenlik, jeke, sociallıq hám turaqlı rawajlanıwǵa tiyisli kompetenciyalardı oqıtıw procesine integraciyalawǵa járdem beredi.
Joybardıń tiykarǵı maqseti awıl turizmi tarawında isbilermenlik boyınsha oqıw kursın islep shıǵıw hám engiziwden ibarat. Bul baǵdarda zamanagóy oqıtıw metodologiyaların qollanıw hám kompetenciyalarǵa baǵdarlanǵan tálim mazmunın qáliplestiriwge ayrıqsha itibar qaratılmaqta.
