Ilajda xalıqaralıq ekspertler, joqarı oqıw orınları hám birge islesiwshi shólkemler wákilleri menen bir qatarda, Ózbekstandaǵı Evropa Awqamı Delegaciyasınıń awıl xojalıǵı sektorı basshısı Roberto Aparicio hám Ózbekstan Respublikası Ekologiya hám klimat ózgeriwi milliy komitetiniń bas qánigesi de qatnastı.
Nókis mámleketlik texnika universiteti professorı, Erasmus+ joqarı bilimlendiriwdi reformalaw boyınsha ekspertler milliy toparı (HEREs) aǵzası hám Erasmus+ CBHE MECAS joybarı koordinatorı Asiya Tureniyazova ilaj sheńberinde "Ámelge asırıwdaǵı qıyınshılıqlardan ámeliy sheshimlerge shekem" temasında interaktiv seminar ótkerdi.
Seminarda joybarlardı ámelge asırıw procesinde júzege keletuǵın mashqalalardı anıqlaw, olardı saplastırıw boyınsha ámeliy sheshimlerdi islep shıǵıw máseleleri dodalandı. Qatnasıwshılar óz tájiriybeleri hám usınısları menen bólisti.
Xalıqaralıq ushırasıw Erasmus+ joybarları sheńberinde tájiriybe almasıw, mashqalalarǵa nátiyjeli sheshimler tabıw jáne joqarı bilimlendiriw hám ekologiyalıq turaqlılıq baǵdarlarındaǵı birge islesiwdi rawajlandırıwǵa xızmet etti.
