NMTUda Erasmus+ xalıqaralıq seminarı baslandı
Nókis mámleketlik texnika universitetinde Evropa Awqamınıń Erasmus+ baǵdarlaması sheńberinde "Joqarı bilimlendiriw hám ilimiy izertlewlerde jasalma intellekt: bahalaw, akademiyalıq hadallıq, etika hám isenimli nátiyjeler" temasında xalıqaralıq seminar baslandı.
26-27-oktyabr kúnlerinde ótkeriletuǵın seminarda joqarı bilimlendiriw hám ilimiy izertlewlerde jasalma intellektten paydalanıw, bilimlerdi bahalaw, akademiyalıq hadallıqtı támiyinlew hám ádep-ikramlılıq principlerine ámel etiw máseleleri dodalanbaqta.
Ilajda Qaraqalpaqstan Respublikası Joqarǵı Keńesiniń Komitet baslıǵı Murat Atamuratov joqarı bilimlendiriw sistemasın rawajlandırıw hám xalıqaralıq birge islesiwdi keńeytiw máselelerine toqtap ótti.
Nókis mámleketlik texnika rektorı, professor Batırbek Kaipbergenov Erasmus+ baǵdarlamasınıń joqarı bilimlendiriwdi rawajlandırıw, xalıqaralıq birge islesiwdi bekkemlew hám aldınǵı tájiriybelerdi úyreniwdegi áhmiyetin atap ótti.
Seminarda Shveciyanıń Uppsala universitetiniń professorı Sonja Bjelobaba tikkeley qatnasıp, akademiyalıq hadallıq hám generativ jasalma intellektten paydalanıw máseleleri boyınsha bayanat isledi. Avstriyanıń Graz texnologiya universitetiniń professorı Martin Ebner bolsa seminarda onlayn formatta qatnaspaqta.
Erasmus+ Milliy ofisi janındaǵı joqarı bilimlendiriwdi reformalaw boyınsha ekspert Asiya Tureniyazova da seminar temasınıń áhmiyetliligi hám joqarı bilimlendiriwdegi reformalar menen baylanıslı táreplerine itibar qarattı.
Eki kúnlik seminar sheńberinde bayanatlar, ámeliy sabaqlar hám dodalawlar ótkeriledi. Ilaj xalıqaralıq tájiriybe almasıw, bilimlendiriwdiń sapasın arttırıw hám jasalma intellektten juwapkershilikli paydalanıw boyınsha bilimlerdi keńeytiwge xızmet etedi. 
