2026-jıl 15–19-oktyabr kúnleri Qıtaydıń Guanchjou qalasında ótkerilip atırǵan "CANTON" xalıqaralıq kórgizbe-yarmarkasında Nókis mámleketlik texnika universitetiniń wákilleri qatnaspaqta.
Universitet wákilleri – "Energetika injenerligi" kafedrası baslıǵı, docent Azimjon Yuldashev hám "Avtomatlastırıw hám basqarıw" kafedrası docenti Bexzod Jumamuratov usı kórgizbe sheńberinde energetika hám sanaat tarawlarındaǵı zamanagóy texnologiyalar, energiya únemlewshi úskeneler hám islep shıǵarıw processlerin avtomatlastırıwǵa baylanıslı aldınǵı sheshimler menen tanıspaqta.
Ilaj dawamında sırt el kompaniyalarınıń wákilleri menen ushırasıwlar ótkeriw, elektr ısıtıw qazanların islep shıǵarıw texnologiyaları, energiya nátiyjeliligin arttırıw usılları hám avtomatlastırılǵan basqarıw sistemaları boyınsha tájiriybe almasıwǵa ayrıqsha itibar qaratılmaqta.
Kórgizbede úyrenilip atırǵan tájiriybeler keleshekte universitettiń bilimlendiriw hám ilimiy-izertlew jumısında paydalanıw, injenerlik baǵdarlarında ámeliy joybarlardı rawajlandırıw jáne bilimlendiriw hám óndiris arasındaǵı birge islesiwdi keńeytiw ushın ayrıqsha áhmiyetke iye.
NMTU wákilleriniń Qıtaydaǵı xalıqaralıq kórgizbede qatnasıwı aldınǵı sırt el tájiriybesin ózlestiriw, zamanagóy texnologiyalıq sheshimlerdi úyreniw hám universitettiń xalıqaralıq birge islesiw baylanısların rawajlandırıwǵa xızmet etedi.
