14-oktyabr kúni Ózbekstan Milliy universitetinde Nókis mámleketlik texnika universiteti rektorı Batırbek Kaipbergenov hám Ózbekstan Milliy universiteti rektorı Inom Madjidov qatnasıwında ushırasıw bolıp ótti.
Ushırasıwda Nókis mámleketlik texnika universitetiniń bilimlendiriw hám ilimiy jumısın rawajlandırıw, zamanagóy bilimlendiriw standartların engiziw hám eki universitet arasındaǵı akademiyalıq birge islesiwdi bekkemlew máseleleri dodalandı.
Birge islesiw sheńberinde informaciyalıq texnologiyalar, jasalma intellekt, matematika, ekologiya, gidrologiya hám gidrometeorologiya baǵdarlarında ÓzMUdıń ilimiy potencialı hám aldınǵı tájiriybesinen paydalanıw, oqıw procesin jetilistiriw, professor-oqıtıwshılardıń mamanlıǵın arttırıw hám zamanagóy oqıw ádebiyatların jaratıw perspektivaları kórip shıǵıldı.
Sonday-aq, dual bilimlendiriwdi rawajlandırıw, akademiyalıq almasıwdı jolǵa qoyıw hám Aralboyı ekologiyalıq mashqalalarına baylanıslı ilimiy izertlewlerdi qollap-quwatlaw máselelerine ayrıqsha itibar qaratıldı.
Ushırasıw juwmaǵında tárepler birge islesiw Memorandumı hám shártnamasına qol qoydı. Bul kelisimler bilimlendiriw hám ilim tarawlarında óz ara birge islesiwdi rawajlandırıw, professor-oqıtıwshılar hám studentler ushın jańa imkaniyatlar jaratıwǵa xızmet etedi.
