Ustaz – insanǵa bilim berip, onıń ómir jolın belgilewge, keleshekke isenim menen qarawǵa járdemlesetuǵın ullı tulǵa. Sizlerdiń miynetińiz, ibratlı jumısıńız hám tınımsız izleniwlerińiz jas áwladtıń bilimli, tereń pikirleytuǵın, óz kásibine sadıq insanlar bolıp kamalǵa keliwinde áhmiyetli tiykar bolıp xızmet etpekte. Búgingi jedel rawajlanıp atırǵan dáwirde joqarı bilim hám zamanagóy ámeliy kónlikpelerge iye qánigelerdi tayarlaw ayrıqsha áhmiyetke iye.
Prezidentimiz atap ótkenindey, dúnya jámiyetshiliginde múnásip orın iyelewimiz ushın bilimli, keleshek kásiplerin puqta iyelegen, erkin pikirge iye bolǵan jańa áwlad qánigeleri kerek. Sonıń ushın bilimlendiriwge sapa hám mazmun alıp kiriw, muǵallimniń abırayın arttırıw áhmiyetli wazıypalardan biri bolıp esaplanadı.
Bul juwapkershilikli wazıypanı ámelge asırıwda, ásirese, texnika hám injenerlik tarawlarında bilim berip atırǵan professor-oqıtıwshılardıń miyneti oǵada áhmiyetli. Sizlerdiń tereń bilimlerińiz, bay tájiriybeńiz hám kásibińizge bolǵan sadıqlıǵıńız universitetimizde bilim alıp atırǵan jaslardıń keleshegin belgilewde úlken áhmiyetke iye.
Prezidentimiz ustaz hám muǵallimler menen ushırasıwda muǵallimshilik kásibiniń qanshelli ullı hám maqtanıshlı ekenin atap ótip, "Muǵallim – mehir dáryası, muǵallim – jaqsılıq bulaǵı, muǵallim – aǵartıwshılıq quyashı!" dep joqarı baha berdi. Haqıyqatında da, ustazlar búgin jaslar qálbine egip kiyatırǵan aǵartıwshılıq hám jaqsılıq tuqımınıń óniminen erteń pútkil jámiyet paydalanadı. Hesh bir texnologiya balanıń qálbine ustazday jol tawıp, oǵan Watanǵa muhabbat hám juwapkershilik sezimin sińdirip bere almaydı. Usı mánide, sizlerdiń jas áwladtıń tálim-tárbiyasına qosıp atırǵan úlesińiz tek ǵana búgingi kún emes, al elimizdiń erteńgi rawajlanıwı ushın da sheksiz áhmiyetke iye.
Universitetimizde bilimlendiriwdiń sapasın arttırıw, ilimiy izleniwlerdi rawajlandırıw hám zamanagóy talaplarǵa juwap beretuǵın, joqarı maman qánigelerdi tayarlaw jolında alıp barıp atırǵan pidákerlik miynetińiz ushın sizlerge tereń minnetdarshılıq bildiremen.
Qádirli ustazlar!
Bul bayram kúninde sizlerge bekkem densawlıq, shańaraqlarıńızǵa tınıshlıq, amanlıq hám abadanlıq, juwapkershilikli jumısıńızda jańa tabıslar tileymen. Shákirtlerińizdiń jetiskenlikleri hámiyshe miynetińizdiń jemisi, siz ushın quwanısh hám maqtanısh alıp kelsin!
Muǵallimler hám ustazlar kúni múbárek bolsın!
Húrmet penen,
B.T. Kaipbergenov,
Nókis mámleketlik texnika universiteti rektorı
