Xiywa qalasında ótkizilip atırǵan Ózbekstan–Belarus parlamentler aralıq forumı sheńberinde Nókis mámleketlik texnika universiteti hám Belarus mámleketlik informatika hám radioelektronika universiteti arasında informaciya-kommunikaciya texnologiyaları tarawında qánigelerdi qospa bilimlendiriw tiykarında tayarlaw boyınsha shártnama imzalandı.
Hújjet Nókis mámleketlik texnika universiteti rektorı, t.i.d., professor B.T. Kaipbergenov hám Belarus mámleketlik informatika hám radioelektronika universiteti rektorı V.A. Bogush tárepinen imzalandı.
Kelisim sheńberinde bilimlendiriw baǵdarlamaların baylanıstırıw, zamanagóy xalıqaralıq tájiriybelerdi oqıw procesine engiziw, sonday-aq IT tarawında joqarı dárejeli qánigelerdi tayarlaw boyınsha birgeliktegi isler alıp barıladı.
Bul birge islesiw studentler ushın xalıqaralıq bilimlendiriw imkaniyatların keńeytiw, zamanagóy bilim hám ámeliy kónlikpelerdi iyelew, sonday-aq eki joqarı oqıw ornı arasında bilim hám tájiriybe almasıwdı rawajlandırıwǵa xızmet etedi.
