Nókis mámleketlik texnika universiteti "Ekonomika hám telekommunikaciya injiniringi" fakulteti "Maǵlıwmatlardı uzatıw sistemaları hám tarmaqları" kafedrası oqıtıwshısı Aygul Tumaeva Nókis qalasında bolıp ótken TECHNOWOMEN xalıqaralıq forumında spiker sıpatında qatnastı.
Forum sheńberinde Aygul Tumaeva hayallar jetiskenlikleri temasında spikerlik etip, hayal-qızlardıń zamanagóy texnologiyalar, bilimlendiriw, innovaciya hám isbilermenlik tarawlarındaǵı múmkinshilikleri hám erisip atırǵan nátiyjeleri haqqında pikir bildirdi.
TECHNOWOMEN xalıqaralıq platforması hayal-qızlardıń zamanagóy tarawlardaǵı belsendiligin qollap-quwatlaw, tájiriybe almasıw hám jańa múmkinshiliklerdi keńeytiwge xızmet etedi.
Forumdaǵı qatnasıwı menen birge, Aygul Tumaeva "Women in Tech CCA Awards 2026" tańlawında da Ózbekstan atınan munásip qatnasıp atır. Ol usı tanlawdıń final basqıshına shıqqan 15 Ózbekstanlıq qatnasıwshınıń biri.
Usı jılı Oraylıq Aziya mámleketleri arasında ótkerilip atırǵan tańlawdıń final basqıshına 45 hayal-qız jollanba alǵan bolıp, olardıń 15i Ózbekstan wákilleri esaplanadı.
"Women in Tech CCA Awards" texnologiyalar, innovaciyalar, isbilermenlik, bilimlendiriw hám basqa zamanagóy baǵdarlarda xızmet etip atırǵan hayallardıń jetiskenliklerin tán alıwǵa baǵdarlanǵan xalıqaralıq platformalardan biri.
Nókis mámleketlik texnika universiteti jámááti Aygul Tumaevaǵa final basqıshında tabıs tileydi!
