Nókis mámleketlik texnika universitetine Koreya Respublikasınan delegaciya keldi. Delegaciya quramında K-ICT Entrepreneurs Association baslıǵı Seong-Hwan Lee, Namseoul University professorı Seok-Hee Lee, Seoul Shinmun gazetası jurnalisti Jong-ik Lee, sonday-aq Koreya Respublikası menen birge islesiw boyınsha Joqarǵı Keńes Baslıǵı másláhátshisi Gozzal Shamuratova basshılıǵındaǵı wákiller qatnastı.
Sapar dawamında delegaciya wákilleri universitettiń bilim beriw baǵdarları, studentler ushın jaratılǵan múmkinshilikler, ilimiy-izertlew hám innovaciyalıq jumıslar, oqıw procesin shólkemlestiriw, sonday-aq universitettiń materiallıq-texnikalıq múmkinshilikleri menen tanıstı.
Universitet rektorı, t.i.d., professor Batırbek Kaipbergenov, prorektorlar hám tiyisli juwapkerler qatnasqan ushırasıwda Koreya joqarı oqıw orınları hám shólkemleri menen birge islesiwdi rawajlandırıw máseleleri talqılandı.
Atap aytqanda, K-ICT Entrepreneurs Association menen Qaraqalpaqstandaǵı joqarı oqıw orınları arasında baylanıslardı jolǵa qoyıw, startap joybarların qollap-quwatlaw, akselerator orayların ashıw hám xalıqaralıq grantlardı tartıw boyınsha pikir almasıldı.
Sonday-aq, Namseoul University menen akademiyalıq almasıwdı rawajlandırıw, professor-oqıtıwshılar hám studentler mobilligin jolǵa qoyıw, tájiriybe almasıw hám birgeliktegi ilimiy joybarlardı ámelge asırıw múmkinshilikleri kórip shıǵıldı.
KOICA grant joybarlarında birgelikte qatnasıw hám xalıqaralıq joybarlardı ámelge asırıw máseleleri de talqılandı.
Sapar juwmaǵında tárepler kelisilgen baǵdarlar boyınsha birge islesiwdi dawam ettiriw, baylanıslardı jáne de keńeytiw hám birgeliktegi joybarlardı islep shıǵıwǵa kelisip aldı.
