Nókis mámleketlik texnika universitetinde Koreya Respublikasınıń Sun Moon universiteti wákili Choi Jae Sung menen ushırasıw bolıp ótti. Ushırasıwda eki joqarı oqıw ornı arasındaǵı birge islesiwdi keńeytiw, bilimlendiriw hám ilimiy-izertlew baǵdarlarında qospa joybarlardı ámelge asırıw, studentler hám professor-oqıtıwshılar ushın xalıqaralıq imkaniyatlardı arttırıw máseleleri boyınsha pikir almasıldı.
Sáwbetlesiw dawamında Nókis mámleketlik texnika universitetinde zamanagóy texnologiyalar, IT hám innovaciyalar baǵdarındaǵı bilimlendiriw hám ilimiy jumıslar, sonday-aq, Sun Moon universitetiniń xalıqaralıq tájiriybesi hám birge islesiw múmkinshilikleri haqqında pikir almasıldı.
Ushırasıwda IT hám jasalma intellekt, ekologiya hám tábiyiy resurslar baǵdarlarında birgeliktegi joybarlardı islep shıǵıw, studentler ushın «2+2» qospa bilimlendiriw baǵdarlamasın jolǵa qoyıw, professor-oqıtıwshılar hám studentlerdiń akademiyalıq mobilligin rawajlandırıw, tájiriybe almasıw hám stajirovka imkaniyatların keńeytiw máselesi de qaraldı.
Sonday-aq, koreys tilin úyreniw imkaniyatların keńeytiw, birgelikte xalıqaralıq grantlarǵa hám ilimiy-izertlew joybarlarına qatnasıw boyınsha birge islesiw perspektivaları dodalandı. Ushırasıw eki joqarı oqıw ornı arasındaǵı akademiyalıq hám ilimiy baylanıslardı jańa basqıshqa shıǵarıw, studentler ushın xalıqaralıq bilim hám tájiriybe almasıw imkaniyatların keńeytiwge xızmet etedi.
