Nókis mámleketlik texnika universitetinde dual tálim sisteması studentlerdiń teoriyalıq bilimlerin real óndiris processleri menen úylestiriw, kásiplik kónlikpelerin rawajlandırıw hám keleshektegi miynet jumısına tayarlawǵa qaratılǵan.
Bul tálim túri sheńberinde Injenerlik texnologiyaları fakultetiniń "Jol háreketin shólkemlestiriw" hám "Transport quralları injenerligi" tálim baǵdarlarında oqıp atırǵan 2-kurs studentleri "Sapsan Trans Nukus" JShJda ámeliy sabaqlar arqalı óz qánigelikleri boyınsha real jumıs processleri menen jaqınnan tanıspaqta.
"Ekologiya hám qorshaǵan ortalıqtı qorǵaw" tálim baǵdarınıń 3-kurs studentleri universitette teoriyalıq hám oqıw-ámeliy sabaqların alıp barıp, kásiplik kompetenciyaların qáliplestiriwge qaratılǵan ámeliy jumısın "Aralboyı xalıqaralıq innovaciya orayı"nda dawam ettirmekte.
Mexanika injenerligi, miynet hám texnika qáwipsizligi kafedrası docenti R.Kenesbaev hám aǵa oqıtıwshı Q.Shinibekov basshılıǵında "Mexanika injenerligi" tálim baǵdarınıń 4-kurs studentleri "Nawayı kán-metallurgiya kombinatı" AJnıń Taqıyatas metall konstrukciyalar hám arnawlı úskeneler islep shıǵarıw zavodında óndiris processleri menen tanısıp, teoriyalıq bilimlerin ámeliy kónlikpeler menen bekkemlemekte.
Sonday-aq, Kánshilik hám energetika fakultetiniń "Elektr energetika" tálim baǵdarınıń 4-kurs studentleri "Solar Sall" JShJda, "Metallurgiya injenerligi" tálim baǵdarınıń 4-kurs studentleri bolsa "Osten Technologies" JShJda óz qánigelikleri boyınsha ámeliy tájiriybe arttırmaqta.
Dual tálim procesinde studentler oqıw sabaqlarında iyelegen bilimlerin ámeliy tapsırmalar menen baylanıstırıp, zamanagóy texnologiyalar, óndiris procesleri hám miynet ortalıǵın tikkeley úyreniw imkaniyatına iye bolmaqta. Bunday kózqaras tálim hám óndiristiń integraciyasın kúsheytiw, maman qánigelerdi tayarlaw hám studentlerdiń kásiplik kompetenciyaların ámeliy jumıs arqalı rawajlandırıwǵa xızmet etpekte.
