Búgin, 4-sentyabr kúni, Nókis mámleketlik texnika universitetinde tálim baǵdarların xalıqaralıq akkreditaciyadan ótkeriw máselesi boyınsha ZOOM platforması arqalı sáwbet ótkerildi.
Universitet tárepinen Germaniyanıń ASIIN (Accreditation Agency for Degree Programmes in Engineering, Informatics, Natural Sciences and Mathematics) xalıqaralıq akkreditaciya agentligine 2 bakalavriat — Kompyuter injiniringi hám Programmalıq injiniringi, sonday-aq 2 magistratura — Kompyuter injiniringi hám Programmalıq injiniringi tálim baǵdarları boyınsha hújjetler tapsırılǵan.
ZOOM arqalı bolıp ótken sáwbet dawamında atap ótilgen tálim baǵdarların xalıqaralıq akkreditaciyadan ótkeriw procesiniń házirgi jaǵdayı, keyingi basqıshları hám aldaǵı wazıypalar talqılandı. Sonıń menen birge, akkreditaciya procesin nátiyjeli shólkemlestiriw boyınsha tiyisli usınıs hám kórsetpeler berildi.
Sáwbet juwmaǵında xalıqaralıq akkreditaciya baǵdarındaǵı jumıslardı jáne de jetilistiriw maqsetinde bunday formattaǵı ZOOM arqalı sáwbetlerdi turaqlı túrde ótkerip barıw boyınsha kelisip alındı.
