Búgin Nókis mámleketlik texnika universitetinde Ǵárezsizligimizdiń 35 jıllıǵı hám jańa oqıw jılına tayarlıq kóriw, universitettiń jańa strukturası tiykarında jumıstı shólkemlestiriw hám basqa da áhmiyetli máselelerge arnalǵan jıynalıs ótkerildi.
Jıynalıs kún tártibindegi máseleler tiykarında universitettiń jańa strukturası boyınsha atqarılǵan jumıslar hám aldında turǵan wazıypalar haqqında maǵlıwmat berildi. Reje finans bólimi tárepinen Joqarı bilimlendiriw, ilim hám innovaciyalar ministrligine usınıp, tiyisli ózgertiwler kirgizilgen universitet strukturası tiykarında birqatar kafedra baslıqları hám ayırım bólim baslıqları tayınlanǵanı atap ótildi.
Jıynalısta Prezidentimizdiń jaslar menen ushırasıwında belgilegen wazıypalardan kelip shıǵıp, studentlerdiń oqıwdan bos waqıtların mazmunlı shólkemlestiriw, olardı kásipke baǵdarlaw hám zamanagóy kásiplerge qızıǵıwshılıǵın arttırıw boyınsha atqarılıwı tiyis bolǵan jumıslar belgilep berildi.
Bunnan tısqarı, universitet aymaǵın hám oqıw korpusların jańa oqıw jılına tayarlaw, bezew jumısların sapalı ámelge asırıw, ruwxıylıq múyeshlerin zaman talabına say shólkemlestiriw máselesine ayrıqsha itibar qaratıldı.
Oqıw procesiniń materiallıq-texnikalıq bazasın jáne de bekkemlew maqsetinde kompyuter auditoriyaları, laboratoriya xanaları hám oqıw auditoriyaların tayarlaw, olardı zamanagóy talaplarǵa sáykes jaǵdayǵa keltiriw boyınsha wazıypalar belgilendi.
Sonday-aq, oqıw korpuslarındaǵı qurılıs jumısların jedellestiriw, belgilengen jumıslardı sapalı hám óz waqtında tapsırıw boyınsha tiyisli basshılarǵa anıq tapsırmalar berildi.
Jıynalıs juwmaǵında hárbir baǵdar boyınsha atqarılatuǵın jumıslardıń anıq wazıypaları belgilenip, olardıń orınlanıwın támiyinlew boyınsha juwapkerlerge tiyisli tapsırmalar berildi.
