Ózbekstan Respublikası Prezidentiniń basshılıǵında 2026-jıl 27-iyul kúni janılǵı-energetika tarmaǵındaǵı tiykarǵı wazıypalar boyınsha ótkerilgen videoselektor májilisinde belgilengen wazıypalardıń orınlanıwın támiyinlew maqsetinde Nókis mámleketlik texnika universitetinde energetika baǵdarındaǵı studentlerdi ámeliyatqa baǵdarlaw hám kárxanalar menen birge islesiwdi keńeytiw boyınsha jumıslar alıp barılmaqta.
Universitettiń "Taqıyatas ÍES" AJ hám "Aymaqlıq elektr tarmaqları" AJ Qaraqalpaqstan aymaqlıq filialı menen birge islesiwi sheńberinde studentlerdi dual tálim tiykarında óndiris processlerine tartıw názerde tutılǵan.
2026/2027-oqıw jılında 3-kurs studentleri ushın háptesine 2 kún teoriyalıq hám 3 kún ámeliy, 4-kurs studentleri ushın bolsa 1 kún teoriyalıq hám 4 kún ámeliy sabaqlar shólkemlestiriliwi rejelestirilgen.
Sonday-aq, 3-kurs studentleriniń 50 procenti, 4-kurs studentleriniń bolsa 100 procentin dual bilimlendiriw tiykarında kárxanalardaǵı ámeliy sabaqlarǵa tartıw boyınsha tiyisli jumıslar ámelge asırılmaqta.
Bul birge islesiw studentlerdi kárxanalardıń tiyisli bólimlerine biriktiriw, olardıń qánigeligi boyınsha ámeliy hám kásiplik kónlikpelerin rawajlandırıw jáne óndiris processleri menen jaqınnan tanıstırıwǵa xızmet etedi.
Nátiyjede studentler teoriyalıq bilimlerin ámeliyatta bekkemlep, energetika tarawındaǵı zamanagóy óndiris processleri boyınsha zárúr tájiriybege iye bolıw imkaniyatına iye boladı.
