Nókis mámleketlik texnika universiteti tárepinen shólkemlestirilgen “Nókis mámleketlik texnika universiteti xabarshısı” ilimiy jurnalı Ózbekstan Respublikası Sanlı texnologiyalar ministrligi janındaǵı Málimlemelestiriw hám telekommunikaciyalar tarawında qadaǵalaw inspekciyası tárepinen 2026-jıl 10-iyul kúni №1701043-sanlı gúwalıq penen respublika ilimiy jurnalı sıpatında mámleketlik dizimnen ótkerilgenligin bildiremiz. Usıǵan baylanıslı, jurnaldıń 1-sanı ushın ilimiy maqalalar qabıl etiletuǵınlıǵın DAǴAZALAYMÍZ.
“Nókis mámleketlik texnika universiteti xabarshısı” ilimiy jurnalına maqalalar tómendegi baǵdarlar boyınsha qabıl etiledi: fizika – matematika, ximiya, biologiya, geologiya-mineralogiya, texnika, tariyx, ekonomika, filologiya, pedagogika.
MAQALALARDÍ QABÍL ETIW TALAPLARÍ:
1. Maqala eki tiyisli qánigelerdiń pikir-usınısı (ishki hám sırtqı) hám antiplagiattan tekseriw nátiyjesi hám menen birge usınılıwı shárt.
2. Maqalalar qaraqalpaq, ózbek, rus hám inglis tillerinde, qaǵazda avtorlardıń qoltańbaları menen, sonday-aq, elektron versiyası menen qabıl etiledi.
3. Maqalalar IMRAD talapları tiykarında jazılıwı kerek. Tema, annotaciya hám tayanısh (klyuch) sózler 3 tilde beriliwi kerek, Tayanısh sózler keminde 5 sózden, annotatsiya keminde 3-4 gápten ibarat boladı.
4. Tekst shrifti 14 shriftte, hárbir qatar aralıǵı 1,5 interval hám hámme tárepinen - 2sm. Maqala 6 betten kem bolmawı kerek.
5. Tema bas háripler menen jazıladı, tómeninde avtorlardıń tolıq atı, ilimiy dárejesi, ataǵı, lawazımı hám jumıs ornı kórsetiledi.
6. Paydalanǵan ádebiyatlardıń tolıq dizimi maqala aqırında keltiriledi hám tekst ishindegi siltemeler ádebiyatlar dizimi boyınsha kvadrat qawsırma ishinde sanlarda beriledi [1:15]. Ádebiyatlar diziminde tek ǵana silteme alınǵan ádebiyatlar keltiriledi. Ádebiyatlar dizimi avtor, ádebiyat atı, baspa atı, jılı hám betleri tolıq kórsetiliwi shárt.
7. Strukturalıq, faktlik hám stilistikalıq qátelikler ushın avtorlar juwapker.
8. Redakciya barlıq maqalalardı qosımsha tekseriw ushın jiberedi. Redakciya maqalalardı qısqartıw hám redaktorlaw huqıqına iye.
9. Maqala aqırında avtorlardıń mánzilleri hám baylanıs nomerleri kórsetiliwi kerek.
10. Maqalalardı elektron pochta arqalı nmtujurnal@gmail.com mánziline, +998920889669 telefon nomerine telegram arqalı jiberiw múmkin.
Jurnaldıń 1-sanı ushın maqalalar 2026-jıl 25-sentyabrde shekem qabıl etiledi.
Belgilengen talaplar tiykarında jazılmaǵan maqalalar járiyalanbaydı.
JURNAL REDAKCIYASÍ