Ózbekstan Respublikası Prezidentiniń "Bilimlendiriwdiń sapasın támiyinlew hám bilimlendiriw xızmetlerin kórsetiw sistemasın jetilistiriw boyınsha qosımsha ilajlar haqqında"ǵı Pármanına muwapıq, Bilimlendiriwdiń sapasın támiyinlew milliy agentligi tárepinen respublika kóleminde Ulıwma milliy jumıs beriwshiler sorawnaması ótkerilmekte.
Sorawnama usı jıldıń 27-iyulinen baslap respublikanıń barlıq aymaqlarında ótkerilmekte. Bul processten gózlengen tiykarǵı maqset — joqarı bilimlendiriw shólkemleri hám texnikumlar pitkeriwshileriniń bilim, ámeliy kónlikpelerin jumıs beriwshilerdiń pikiri tiykarında bahalaw, olardıń tayarlıǵınıń zamanagóy miynet bazarı talaplarına muwapıqlıǵın anıqlaw jáne bilimlendiriw hám real ekonomika arasındaǵı baylanıstı bekkemlewden ibarat.
Qaraqalpaqstan Respublikasında da sorawnama procesine arnawlı tayarlıqtan ótken operatorlar tartıldı. Sonıń ishinde, "Ózbektelekom" AK Arqa filialına barıp, jumıs beriwshiler arasında sorawnama ótkerildi. Sorawnama procesinde usı filialda jumıs alıp barıp atırǵan Nókis mámleketlik texnika universiteti pitkeriwshileriniń kásiplik tayarlıǵı hám jumıs iskerligi boyınsha jumıs beriwshilerdiń pikirleri úyrenildi.
Sorawnama nátiyjeleri pitkeriwshilerdiń kásiplik tayarlıǵın bahalaw hám bilimlendiriw procesin miynet bazarı talaplarına jáne de beyimlestiriwde úlken áhmiyetke iye.
