Ózbekstan Respublikası Prezidentiniń «Bilimlendiriwdiń sapasın támiyinlew hám bilimlendiriw xızmetlerin kórsetiw sistemasın jetilistiriw boyınsha qosımsha ilajlar haqqında»ǵı Pármanına muwapıq, Bilimlendiriwdiń sapasın támiyinlew milliy agentligi tárepinen respublikalıq kólemde Ulıwma milliy jumıs beriwshiler sorawnaması ótkerilmekte.
Búgin, 11-avgust kúni Berdaq atındaǵı Qaraqalpaq mámleketlik universitetinde ótkerilgen májiliste agentliktiń bas inspektorı Rahmatjon Ruzmetov sorawnamadan gózlengen tiykarǵı maqset – joqarı bilimlendiriw shólkemleri hám texnikumlar pitkeriwshileriniń bilim, ámeliy kónlikpe hám kompetenciyaların tikkeley jumıs beriwshilerdiń pikiri tiykarında bahalaw, olardıń tayarlıǵı zamanagóy miynet bazarı talaplarına qay dárejede sáykes keletuǵının anıqlaw hám bilimlendiriw menen real ekonomika talapları arasındaǵı baylanıstı jáne de kúsheytiwden ibarat ekenin bildirip ótti.
Atap ótilgenindey, usı jıldıń 27-iyulınan baslap sorawnama respublikanıń barlıq aymaqlarında ámelge asırılmaqta.
Qaraqalpaqstan Respublikasında ótkerilgen sorawnama procesine de arnawlı tayarlıqtan ótken operatorlar biriktirilip, olar jumıs beriwshiler menen telefon arqalı intervyu ótkerdi. Sonıń menen birge, zárúr jaǵdaylarda kárxana hám shólkemlerge tikkeley barıp jumıs beriwshiler menen sáwbetlesiwler shólkemlestirildi. Sorawnama respublikadaǵı joqarı bilimlendiriw shólkemleri hám texnikumlardıń pitkeriwshilerin jumısqa qabıl etken hár qıylı taraw hám tarmaqlardaǵı jumıs beriwshilerdi qamtıp aldı.
