Nókis mámleketlik texnika universiteti Málimleme-resurs orayında 2026/2027-oqıw jılın múnásip kútip alıw, student hám izleniwshiler ushın zárúr sharayatlardı jaratıw maqsetinde tayarlıq jumısları izbe-iz dawam etpekte.
Házirgi waqıtta oray xızmetkerleri tárepinen bar oqıw, ilimiy hám kórkem ádebiyatlar qayta kórip shıǵılıp, tártipke keltirilmekte. Kitap fondı tańlap alınıp, ádebiyatlardıń jaǵdayı úyrenilmekte hám jańa oqıw jılında student-jaslar hám izertlewshiler paydalanıwı ushın zárúr ádebiyatlar tayar jaǵdayǵa keltirilmekte.
Sonday-aq, kitaplardı jaylastırıw, fondtı sistemalastırıw, oqıw zalları hám basqa da paydalanıw aymaqların jańa oqıw jılına tayarlaw boyınsha jumıslar ámelge asırılmaqta.
Málimleme-resurs orayı universitettiń bilimlendiriw hám ilimiy jumısın qollap-quwatlawshı áhmiyetli orınlardan biri bolıp, bul jerde jaratılıp atırǵan qolaylı sharayatlar studentlerdiń erkin bilim alıwı, ilimiy izleniwler alıp barıwı hám kitapqumarlıq mádeniyatın arttırıwǵa xızmet etedi.
Jańa oqıw jılında da Málimleme-resurs orayı universitet studentleri, professor-oqıtıwshıları hám izleniwshilerin zárúr ádebiyatlar hám zamanagóy málimleme resursları menen támiyinlewge tayar.
