Ekonomika tarmaqlarında keminde 5 jıl jumıs stajına iye bolǵan puqaralar tiyisli usınısnama tiykarında joqarı bilimlendiriw shólkemleriniń aralıqtan hám keshki tálim formasına kiriw imtixanlarısız, sáwbet nátiyjelerine muwapıq differenciyalanǵan tólemli-kontrakt tiykarında oqıwǵa qabıl etiliwi múmkin.
Bul tártip Ózbekstan Respublikası Ministrler Kabinetiniń 2021-jıl 4-noyabrdegi 675-sanlı qararı menen tastıyıqlanǵan Nızam tiykarında ámelge asırıladı.
Kimler usı imkaniyattan paydalanıwı múmkin?
Keminde 5 jıl jumıs stajına iye bolǵan hám usınısnama beriw huqıqına iye bolǵan ministrlik, uyım yamasa iri xojalıq birlespesi sistemasında jumıs alıp barıp atırǵan xızmetkerler.
Bunda student bolıw ushın tańlanǵan bakalavriat tálim baǵdarı xızmetkerdiń jumıs iskerligine sáykes bolıwı shárt.
Usınısnama qalay alınadı?
Usınısnama Mámleketlik komissiya tárepinen tastıyıqlanǵan dizimdegi ministrlik, uyım hám iri xojalıq birlespeleriniń birinshi basshısı tárepinen beriledi.
Hárbir shólkem hárbir oqıw jılı ushın óziniń oraylıq hám aymaqlıq strukturaları jáne sistema shólkemlerinen 100 ge shekem talabanǵa usınısnama beriwi múmkin.
Usınısnama tek ǵana berilgen oqıw jılı ushın ámel etedi.
Usınısnamaǵa iye abiturientlerdi dizimge alıw hár jılı 20-iyuldan 10-avgustqa shekem arnawlı elektron sistema arqalı ámelge asırıladı.
Sáwbet joqarı bilimlendiriw shólkemi tárepinen dúzilgen óz aldına Sáwbet komissiyası tárepinen ótkeriledi.
Sáwbette abiturientke jámi 4 soraw beriledi:
− mámlekette ámelge asırılıp atırǵan reformalardıń mánisi hám áhmiyeti;
− tańlanǵan tálim baǵdarın tańlawdan tiykarǵı maqset;
− jumıs dawamında erisilgen jetiskenlikler hám nátiyjeler;
− tańlanǵan tálim baǵdarı boyınsha bilim hám kásiplik kónlikpeler.
Hárbir soraw 25 ball menen bahalanadı. Jámi maksimal ball — 100 ball. Sáwbet komissiyası aǵzaları tárepinen qoyılǵan ballardıń ortasha kórsetkishi 55 balldan joqarı bolǵan abiturient sáwbetten ótken esaplanadı.
Usınısnama tiykarında studentlikke usınıs etilgen shaxs tárepinen tiyisli hújjetler, sonıń ishinde, usınısnama hám xızmetkerdiń pútkil oqıw dáwiri ushın tólemli kontrakt qarjıların óz waqtında tólew boyınsha kepillik xatı usınıladı.
Tólem-kontrakt qarjıları xızmetker jumıs alıp barıp atırǵan tiyisli ministrlik, mákeme, iri xojalıq birlespesi yamasa olardıń sistemasındaǵı shólkemler tárepinen ámelge asırıladı.
Ayırım jaǵdaylarda shólkem tárepinen tólemdi ámelge asırıw imkaniyatı bolmasa, burınǵısınan basqasha tárizde Mámleketlik komissiya tárepinen basqasha tártip belgileniwi múmkin.
Usınısnama tiykarında oqıwǵa qabıl etilgen student:
− keyin ala tiyisli sistemada 5 jıl islep beriwi shárt;
− usınısnama bergen shólkem menen miynet shártnamasın biykarlaǵan jaǵdayda, belgilengen tártipte studentler qatarınan shetletiliwi múmkin;
− bunday jaǵdayda oqıwdı qayta tiklewge ruqsat berilmeydi;
− usınısnama bergen shólkem saplastırılǵan yamasa qayta shólkemlestirilgen jaǵdayda, student differenciyalanǵan tólemli-kontrakttı óz esabınan tólep, oqıwın dawam ettiriwi múmkin;
− usınısnama tiykarında qabıl etilgen studenttiń oqıwın kóshiriwge ruqsat etilmeydi.
Usınıs beriw huqıqına iye shólkemler dizimi
Huqıqıy tiykar: Ózbekstan Respublikası Ministrler Kabinetiniń 2021-jıl 4-noyabrdegi 675-sanlı qararı menen tastıyıqlanǵan "Ekonomika tarmaqlarında keminde bes jıl jumıs stajına iye bolǵan puqaralardı aralıqan hám keshki tálim formasına sáwbet nátiyjelerine muwapıq differenciyalanǵan tólemli-kontrakt tiykarında oqıwǵa qabıllaw tártibi haqqında"ǵı Nızam.
Tolıq: LexUZ — 675-san qarar