Nókis mámleketlik texnika universitetinde Ózbekstan Respublikası Prezidentiniń tiyisli qararına muwapıq Jetekshi injenerlik mektebi shólkemlestirilip, búgingi kúnde nátiyjeli jumıs alıp barmaqta.
Jetekshi injenerlik mektebi sheńberinde sanaat hám bilimlendiriw integraciyası támiyinlenip, "Taqıyatas ÍES" AJ menen tıǵız birge islesiw jolǵa qoyılǵan. Bul birge islesiw tiykarında oqıw processleri óndiris penen baylanıstırılıp, zamanagóy laboratoriyalar hám ámeliy sabaqlar sisteması jolǵa qoyılǵan.
Sonday-aq, mektepte sanaat kárxanaları tárepinen usınılǵan mashqalalar tiykarında ilimiy-izertlew hám tájiriybe-konstruktorlıq jumıslar alıp barılmaqta. Bir qatar innovaciyalıq joybarlar ámelge asırılıp, olardı qarjılandırıwdıń nátiyjeli mexanizmleri engizilgen.
Professor-oqıtıwshılar hám studentler tárepinen innovaciyalıq joybarlar islep shıǵılıp, "Bolajaq alım" tańlawları sheńberinde jeńimpaz joybarlar ámeliyatqa engizilmekte.
Búgingi kúnde Jetekshi injenerlik mektebi zamanagóy laboratoriya úskeneleri menen támiyinlengen bolıp, injenerlik baǵdarlarında joqarı tájiriybeli, ámeliy kónlikpelerge iye qánigelerdi tayarlawda áhmiyetli ilimiy-ámeliy platforma retinde xızmet etpekte.
