28-iyul kúni paytaxtımız Nókis qalasındaǵı "Aqquw" kompleksinde "Keleshekke qádem" baǵdarlaması sheńberinde "TalabaExpo – 2026" kásiplik kórgizbesi ótkerildi.
Kórgizbe pitkeriwshilerdiń bántligin támiyinlew, jaslardı kásipke baǵdarlaw, startap baslamaların qollap-quwatlaw hám isbilermenlik jumısın rawajlandırıwǵa baǵdarlandı. Ilaj dawamında bos jumıs orınları yarmarkası, startap joybarlarınıń prezentaciyası, sonday-aq, jeńilletilgen kreditler hám finanslıq sawatlılıq boyınsha seminarlar shólkemlestirildi.
Nókis mámleketlik texnika universitetiniń professor-oqıtıwshıları hám studentleri yarmarkada startap joybarları, innovaciyalıq islenbeleri hám studentler tárepinen jaratılǵan joybarlar menen belsene qatnastı.
Maǵlıwmat ushın: "Keleshekke qádem" baǵdarlaması sheńberinde Nókis mámleketlik texnika universitetiniń 48 studenti jámi 3 milliard 195 million sum muǵdarındaǵı jeńilletilgen kreditti alıp, óz biznes jumısın jolǵa qoyǵan. Sonıń ishinde, 2024-2025-oqıw jılında 19 student 1 milliard 485 million sum, 2025-2026-oqıw jılında bolsa 29 student 1 milliard 710 million sum muǵdarındaǵı jeńilletilgen kreditten paydalanǵan.
Usı kórgizbe jaslardıń bántligin támiyinlew, isbilermenlik baslamaların qollap-quwatlaw hám olardıń kásiplik rawajlanıwına xızmet etetuǵın áhmiyetli maydan boldı.
